Represiyaların kurbannarına – anmak taşı Komratta
Sentäbri ayın 13-dä Gagauziyanın baş kasabasında açıldı «Politika represiyalarının kurbannarına» anmak taşı.
1359 defa okunmuş - 07 Kasım 2013 - Perşembe 19:17

Açılışta söz tuttular GHT başı D. Konstantinov, Komrat kasabasının primarı N. Dudoglo, hakları koruma «Dooruluk» dernään başı M. Gagauz, yazıcı-tarihçi K. Kurdoglo, represiyalı vatandaşlar dernään predsedateli P. Marinova, “Gagauz halkı” akıntının aktivisti Leonid Dobrov hem başkaları.
Eni anmak taşı erleştirildi kasabanın merkezindä, muzey yapısının  önündä. Mikrofona çıkannar söledilär, ani anmak taşı getirdecek insannarın aklılarına geçän asirin tragediya olaylarını, açan ozamankı politika rejimi insannarı topluca kaldırardı evlerindän da yollandırardı Sibirä.
Biliner, ani Sovet zamannarında 58 bindän zeedä  Moldova vatandaşına yapıldı deportaţiya. Bu sayının içindä yakın dört bin kişi gagauz küülerindän.
Kaldırılmış insannarın çoyu stalin lagerlerindä suuktan, aaçlıktan öldülär. Bu acıyı yok nasıl unutmaa hem unutturmaa.
Açılışta bulunannar susmak minudunnan andılar kabaatsız cannarını kaybedän insannarı.
Bu anmak taşı yapıldı hem erleştirildi Sibirä kaldırılmış, ama şindi geeri çevirilmiş İ. Stefanov hem P. Marinova aylesinin danışmasına görä, angısını onnar yazdılar Komrat primariyasına. Bu proekt için pirmariyadan verildi 40  bin ley hem  birkaç aylä kasabadan kendi kuvedinä görä katkıda bulundular.
Gagauziyada politika represiyalarının kurbannarına bu ikinci anmak taşı. Birincisi açıldı 2003-cü yılda Çadır-Lunga kasabasında.

 

Konstantin Kurdoglo


Sağ üst butonu tıklayarak geri dönebilirsiniz...