Paalı okuyucular!
-1
1018 defa okunmuş - 25 Şubat 2013 - Pazartesi 14:31
Açan İvanna Köksal annatı bana kendi neeti için gagauz dilindä «Meydan» gazetasını çıkarmaa, bän bütün ürektän iki sebep üzerinä sevindim. İlk sebep o, ani büün pek çok lafediler gagauz dilini korumak lääzımnıı için, ama bu konuda pek az yapılêr.
 İvanna korkmadı alınmaa bu  zor, ama pek faydalı iştän – ana dilimizi populärizat etmää.  İkinci sebep – bän pek sevindim, ani gazetanın hazırlanmasınnan kär İvanna zanaatlanacek, çünkü o bulunêr olä  yaşta, açan artık   toplanmış bilgilär hem profesionallık var,  var gençlik havezi yaşamamızda nesä islää tarafa dooru diiştirmää. İvanna gösterdi kendini nicä bir talantlı hem becerekli jurnalist, Gagauziyanın Cümnä televizionunda işleyeräk. Bundan kaarä, işledi Halk Topluşunda deputat, da kendi Kazayak küüyündä çok proekt başa çıkardı.
İvannanın çekettirildii işleri bir zaman da kalmadılar başarılmadık. May hepsi adamaklar, angılarını o verdi Kazayak seçicilerinä, dört yılın içindä yapıldı. Büün İvanna Köksal buldu vakıt hem kuvet Ana dilindä bir eni gazeta çıkarmaa.
Nicä bir okuyucuya bana olaceydı meraklı zeedecä gagauzların istoriyası, kulturası hem adetleri için üürenmää. Beki “Meydanın” sayfalarında bulunacek er bizim genç talantlarımıza deyni, angıları gagauzça yaradêrlar.
İsteerim taa sölemää, ki redakţiya gazetayı herbir okula, bibliotekaya, devlet kurumnarına hem avtonomiyanın büük organizaţiyalarına savaşsın daatmaa. Bunsuz gazetayı bekleer başka gagauz dilindä çıkan yayınnarın eceli – onu sade inteligenţiya, küçük bir çevrä okuyacek. Ama “Meydan” halkın gazetası lääzım olsun!
 İvanna Köksala hem bütün redakţiyaya sabur, saalık hem yaratmak havezini Allah versin! İi saatta!

Sağ üst butonu tıklayarak geri dönebilirsiniz...