Gagauziyada İndustriya Liteyi
-1
985 defa okunmuş - 14 Nisan 2013 - Pazar 12:20
         Bölä bir neet hem düşüncä artık var. Gagauziyada industriya liţeyini açmak için ilk  toplantılar yapıldı, birkaç er dä bakıldı. Başkan yardımcıları V. Yanioglo, N. Stoyanov, Üüretim Bakannıın başı V. Balova hem Türkiyä-Moldova dostluk dernään başı R. Köksal Çok-Maydan hem Çadır-Lunga taraflarında birkaç yapı baktılar. Liţey için en uygun Çadır-Lunga kasabasında bir yapı göründü. Gagauziyada hem Moldovanın içindä çok faydalı proyektleri yaptıran Türkiyenin Moldovada Büük Elçisi Sn. Ahmet Selim Kartal da bu proektin çekettirilmesi hem başa çıkarılması için gagauzların yanında olmaa hem yardımnamaa hazır olduunu söleer.
          Bölä bir liţeydä gençleri üüredeceklär bölä ara işçi zanaatlarına, nicä:
Bilişim tehnologiyalar (bilgisayar, web, network).
 Radio hem televizion tehnikası.
 Yısıtma, suultma-havalandırma sistemaları.
Çiftçilik tehnologiyaları.
Başçacılık hem tepliţacılık.
Aaç, mebel hem iç dekoraţiya.  Maşina-motor bölümü.
Keramika h. b.
         Gagauziya tarafı 2-3 ayın içindä lääzımnı dokumentleri hazırlayacek, Türkiyedä hayır işlerini yapmaa sevän insannar da düzmäk hem donatmak için plannarı  yapacek.  Belli bir zaman için sınır koyulmadı, çünkü bölä  iş seftä başlanılêr.  Uygun hem fayda getirecek bir liţey modeli kurulsun deyni iki taraf ta birliktä işi götüreceklär.
Kurulacek liţeyin üüretmäk proţesi gagauz dilindä yapılacek.

Sağ üst butonu tıklayarak geri dönebilirsiniz...