LENA MOKANU
-1
1042 defa okunmuş - 04 Haziran 2013 - Salı 15:19
Üürener Komrat Devlet Universitetindä. Bilim tarafından taa kuvetlendiynän, pek isteer faydalı olmaa kendi halkına. Şiirleri tiparlandı „Tükenmäz umut kaynaa“ (2009), Akar sel gücü“ (2013) hem “Gagauz şiir antologiyası” (2013) kiyatlarında.

Malimin nasaatı

Gelän-geçän biz toprakta,
İlktän çiçek gibi açêrız.
Büüyüm gibi gün altında
Yavaş, yavaşıcık seneriz.
Te genä  yaklaşêr ilkyaz,
Yaşamamız geçer pek hoş.
Te ihtärlık geler biyaz…
Para, varlık… – inanma, boş.
Kuvet taa varkan güüdendä,
Topla, getir evä,
Kur odanı hem as perdä,
Sofra al evinä.
Suva, boya hem taa yarat,
Üüt un, doldur fırın.
Oollarına sän ger kanat,
Kablet telli gelin!
Dua et Allaha sessiz,
Da tut hep aklında,
Yavrum, gelän-gideniz biz,
Yolcuyuz dünnäda.
Koru, koru onu, ne var!
Sevdir sän kalbini.
Bu dünnäda, inan, pek aar
Tutmaa pak içini.
Koru, koru onu, ne var,
Sevdir topraa, dili.
Yısıt hem sev… vakıt pek dar,
Kaybetmä  kendini.

Sağ üst butonu tıklayarak geri dönebilirsiniz...