KiYATLARIN PREZENTATİYASI YAPILDI
-1
1414 defa okunmuş - 29 Haziran 2013 - Cumartesi 15:38
 “Meydan” gazetasının ofisindä toplandı musaafirlär: gagauz dili üüredicileri, yazıcılar, jurnalistlär, öndercilär. Açılış sözündä Nikolay Stoyanov annattı, nekadar önemni gagauzça kiyatların tiparlanması hem okullara etişmesi. Burada nışannandı, ani bölä büük tiraj - 40.000 kiyat birdän - taa ileri hiç basılmadıydı. Bu sevinmelii halkımıza genä Türkiyä devleti baaşladı.
Ayırı çok şükürlü sözlär sölendi İvanna hem Rafet Köksal aylesinä, ani ikinci kerä üüretmektä hem terbiyetmektä lääzımnı, kıymetli kiyatları basmaa deyni yardım bulêrlar.
Birkaç ay geeri dä liţey klasları için hrestomatiyalar hem uşak başçaları için metodika kiyatları da basıldıydı. Seftä hazırlandı hem artık kullanmak için ellerimizä etişti “Gagauzça sinonimnär sözlüü”. Onun avtorları L. Baurçulu, T. Marinoglu, G. Karanfil, E. Karamit söledilär, ani sözlüü hazırlamaa artık iki yıl geeri bitirmişlär, ama tiparlama sırasına etiştiynän,  iş durgunmuştu. O üzdän nasıl da olsa ilk sinonimnär sözlüü artık var hem büük tirajlan – 5.000 ekzemplär. Onnar okullara, bibliotekalara hem elbetki Ukraynada yaşayan gagauzlara da daadılacek.
Gagauz Respublikasının Prezidenti Stepan Topal prezentaţiyada  söledi, ani bitki zamannar gagauzça çıkan literatura zeedelener, hem ani bu pek önemni faktor bir küçük halkın dili hem kulturasının gelecää için. Hepsi, kim söz aldı prezentaţiyada, ürek sıcaklıınnan seläm söledilär hem şükür ettilär Türkiyedän dostlarımıza, ani yardım ederlär bölä paalı kultura varlıklarımızı koruyalım.
Artık çok sayıda soţial yardım proektlerini Gagauziyada yapan, şindi dä gagauz dilindä “Meydan” gazetasının finans tarafını karşılayan Rafet Köksal belli etti, ani başka ders hem literatura uurunda kiyatları da, kolaylık olursa, bastırmaa savaşaceklar. Sade gagauzlar annasınnar hem korusunnar kendi dilini – en büük varlıını.
Eni sekiz kiyadın arasında var raametli gagauz yazıcılarının G. Gaydarcı, M. Kösä hem N. Baboglunun kirildän latin alfabetinä geçirilmiş kiyatları.
Prezentaţiyanın bitkisindä süzpriz yapıldı – hepsinä gelän musaafirlerä 8-är eni kiyat baaşlandı.
Konstantin Kurdoglo

Sağ üst butonu tıklayarak geri dönebilirsiniz...