105 YAŞINI TAMANNADI
Olga Kiçuk Dezgincä küüyündän kirez ayın 15-dä 105-ci duuma gününü kutladı. Bu gündä ona çok saalık, kısmet hem uzun ömür dua edildi. Kimileri onun yakınnarından artık yok, ama geeridän gelän uşaklar, unukalar hem unukaların unukaları yaşamanın günnerinä renk katêrlar.
1448 defa okunmuş - 22 Temmuz 2013 - Pazartesi 12:56

Olga Kiçuk Dezgincä küüyündän kirez ayın 15-dä 105-ci duuma gününü kutladı. Bu gündä ona çok saalık, kısmet hem uzun ömür dua edildi. Kimileri onun yakınnarından artık yok, ama geeridän gelän uşaklar, unukalar hem unukaların unukaları yaşamanın günnerinä renk katêrlar. Kendisi 1908-dä duudu Ukraynada, Kiev bölgesinin Bobanka küüyündä. Kocası Vasiliy Kiçuk dezginceli, 1930-cu yıllarda gitmiş Ukrayanaya kendinä iş aaramaa, orada da buluşmuşlar. Evlenmişlär, yaşamaa Dezgincedä erleşmişlär. Büük bir aylä, 5 kızları hem bir oolları olmuş. 1954-tä Olga Prokofyevna kocasını kaybetmiş, dul hem 6 uşak elindä kalmış.
Gençliindä sade 4 ay şkolaya gezmiş, traktor kullanmaa üürenmiş. Sovetlär zamanında, uşaklarını ayaa kaldırmaa deyni, traktorcu, taşıyıcı, temizlikçi hem başka işleri da yapmış. Büün sade iki kızı Dezgincedä bulunêr, kalanı Kişinövda, Besarabkada. Birkaç yıl geeri biricik oolu da raametli oldu. Şindi yaşêêrlar ikisi kızınnan Lübaylan (69 yaşında). Lüba hiç evlenmemiş. O sölêêr, ani bu günä kadar anasına hiç bir kerä da doktor çaarılmadı hem ani o bilmeer, neredä bolniţanın kapuları da bulunêr, sade 100 yaşından sora biraz görmää hem işitmää az başladı. Olga Prokofyevnanın en büük kızı 83 yaşına etişti. Unukaların birkaçı artık 3-cü kuşaktan geler. İkinci kuşaktan unukası Slava dayma babusuna yardım eder, evin dolayanında adam işleri onun üstündä.
Bu yaşta oldu karı, ama işsiz taa durmêêr. Güneşli havada sopacıklan, ama aulda yardım eder işleri yapmaa. İmää hep sacak ateşindä pişirmiş, gazlan tanışmamış, ölä bir istemesi şindi dä yok. Ama laf-laftan annadık, ani bu insan yaşamasında türlü ekmektän datmış, zerä cengi dä, aaçlıı da geçirmiş. Tutêr aklısında  hem gözünün önündä ozamankı devlet öndercilerini Brejnevı, Lenini. Olga Kiçuk hepsinä gözäl yaşamak dua eder,  hiç kimsey zorluk çeksin istämeer.
Galina Maresyeva

Sağ üst butonu tıklayarak geri dönebilirsiniz...