MERCANKADAN ENİ KİYATLAR
Mariya İvanovna Kapaklı artık çok yıl yaradêr, kullanarak psevdonimi Mercanka.
1610 defa okunmuş - 09 Aralık 2013 - Pazartesi 22:28

 

Duumasından gelän incelik hem yalpaklık yaraşêr hem onun insannık ruhuna, hem taşıyan psevdoniminä dä. Geçennerdä Mercanka sevindirdi büükleri hem küçükleri eni çıkan çalışmalarınnan. Üç kiyat birdän baaşladı avtor okuyucularına. Tanıdarak yaratmalarını, Mercanka kısadan annattı baş neetleri hem konuları, angılarını açıkladı bu kiyatlarda. Birinci kiyatçık – «Hadin okumaa» – küçük uşaklar için peetlär. İkinci kiyat – «Menevşalar çıvgında» – proza janrasında yazılı. Üçüncü kiyadında – «Bizimnän barabar büüyän masallar» – Mercanka baaşladı rus dilindän gagauzçaya çevirileri. Rusça masalların avtoru Zinovya Duşkova, angısının duuması Gagauziyada. Hepsi bu kiyatların büük faydası olacek uşak başçalarında, başlankı hem orta klaslarda şkola üürenicilerinä hem büük yaşta insannara da, çünkü bu yaratmaların özündä açıklanêr ana tarafına sevgi hem istoriya momentleri. Bu kiyatları Mercanka çıkardı şindilik az sayıda, ama kendi kuvedinnän. Prezentaţiyada bulunan Başkanın yardımcısı Nikolay Stoyanov kutlama sözündä nışannadı, ani kuvetlär savaşaceklar yardımcı olmaa avtora. Eni kiyatlarlan tanışmaa geldilär öndercilär, dostlar, kolegalar, okumayı sevennär. Çoyu, söz alıp, şükür ettilär Mariya Mercankaya hem dua ettilär saalık, ki ileri dooru avtor taa diil bir kerä bu sebeplän onnarı bir araya toplasın. Prezentaţiya yapıldı Komratta Atatürk adına bibliotekada.

Sağ üst butonu tıklayarak geri dönebilirsiniz...