«DRİNA KÖPRÜSÜ» DOKUMENTAL FİLMİNİN TANITIMI
Türkiyedä „TRT HD” kanalında hazırlanan dokumental filmin tanıtımı yapıldı. “Meydan” gazetası da bu prezentaţiyaya katılmak için teklif kabletti.
3436 defa okunmuş - 10 Aralık 2013 - Salı 14:34

       “TRT HD” kanal hem onun koordinatoru Kürşat Özkök yayına geniş geografiyayı kaplayan «Drina Köprüsü» dokumental filmini üzä çıkardılar.

       Balkannarın istoriya hem kultura geçmişi için Türkiyä herzaman önemni rol oynamış. Acıları hem sevinmekleri bu devletlerin insannarınnan hep paylaşmış.

      Balkannarın kimi erlerindä geçän kannı cenklär, politika, ekonomika diişilmekleri – o tarafların insannarını göçetmää zorlamış. Bölä durumnardaTürkiyäyä gelennär hep sıcaklıklan kucaklanmışlar.

      Filmin baş neeti: Türk sportun istoriyasında iz brakmış Balkan kökenni sportçuların annatmalarından eskidän Osmannı vatanı sayılan Balkannarın istoriyasının önemni momentlerini siiredicilerä annatmaa.

        Filmin içindä  Naim Süleymanoglu, Hagi, Halil Mutlu, Prekazi, Şekerbegoviç, Harun Erdenay, Hodziç, Moldovan hem taa çok Balkan kökenni sportçunun hem sport  adamının  aklına getirmeleri, mutlu hem kahırlı günnerini açıklayan sebepleri. Bu adlar zamanında idol gibi sevilärmiş Türkiyedä. Kendileri dä Türkiyedä yaşayan hem çalışan yıllar için büün kendi ana vatannarı gibi annadêrlar. Kimileri karyerasını Türkiyedä yapmaa istemiş, kimilerini ecel oralara götürmüş. Olimpiadalarda, halklararası yarışmalarda çok sıra Türkiyenin adına medali kazanmışlar, o devletin gimnasınnan bayraanı dalgalandırmışlar. Filmdä çoyu sportçuların, trenerlerin yaşamak yollarını kendilerindän işitmää kolaylık veriler.

      «Drina Köprüsü» filmini  yapmaa deyni, Bulgariya, Makedoniya, Serbiya, Bosniya-Gerţegovina hem  Çernogoriyada çekimnär yapılmış.  30 minutluk 5 bölümü dä HD  ses hem görüntü kalitesinnän TRT kanallarında hem çekimnär yapıldıı devletlerin televizionnarında  da yayınnanacek.

       Filmin yapılmasında büük pay bilim adamnarı almış. Çekim yapıldıı devletlerin arhivlerindän dä büük yardım alınmış.

       Film sport temasını taşıyarak, arka planda Balkannarın hem Türkiyenin politika, ekonomika, soţial, istoriya durumnarını da açıklêêr.

 

Not: Drina Köprüsünün tarihteki eri:

Şindiyä kadar Serbiya topraklarının içindä Vişegradta bulunan Drina deresinin üstündeki  Drina Köprüsü, Osmannı İmperatorluunun en büük vizirlerindän biri –  Sokullu Mehmet Paşa tarafından  yaptırılmış. Köprünün bulunduu erleşiminä Saraevodan birkaç saatlık yolculuklan hem çok tunellerdän geçileräk etişiler. Drina deresi “aalayan derä” olarak ta biliner. Balkannarı karıştıran kimi iç kavgalar hem cenklär çok dramatik olaylar bu köprüylän baalanêr.

Öbür taraftan, yazar İvo Andriç (1942 iyül – 1943 dekabri zamannarı için) bu köprü için  yazdıı hem 1945-tä  Belgradta yayınnandıı bir roman da bulunêr arhivdä.

 

 

 

İlgili Fotoğraflar
     «DRİNA KÖPRÜSÜ»  DOKUMENTAL FİLMİNİN TANITIMI      «DRİNA KÖPRÜSÜ»  DOKUMENTAL FİLMİNİN TANITIMI      «DRİNA KÖPRÜSÜ»  DOKUMENTAL FİLMİNİN TANITIMI      «DRİNA KÖPRÜSÜ»  DOKUMENTAL FİLMİNİN TANITIMI      «DRİNA KÖPRÜSÜ»  DOKUMENTAL FİLMİNİN TANITIMI      «DRİNA KÖPRÜSÜ»  DOKUMENTAL FİLMİNİN TANITIMI
Sağ üst butonu tıklayarak geri dönebilirsiniz...