TÜRKİYE HEM MOLDOVA PREZİDENTLERİ ANKARADA BULUŞTULAR
Türkiyenin Cumhurbaşkanı Abdullah Gül hem Moldovanın Prezidenti Nikolae Timofti dekabrinin 18-dä Ankarada ofiţialca buluştular. 1999-cu yıldan beeri bu iki devletlerin prezidentleri ilk kerä bir araya geldilär.
1603 defa okunmuş - 23 Aralık 2013 - Pazartesi 17:51

      Türkiye Cumhurbaşkanı Abdullah Gül Moldovanın Prezidentini Çankaya rezidenţiyasında ofiţial karşılamayalan kabletti. Baş başa hem delegaţyalar arasında yapılan toplantılardan sora mediyacılarlan da buluşuldu. Sayın Gül söledi, ani Moldova hemTürkiyä arasında Osmannı zamannarından kalan kaavi baalantılar var. Moldovada yaşayan gagauzlar da iki devletin dostluk hem iş birlii ilerlemesindä çok büük pay alêrlar, hem ani 15 yıl geçtiktän sora Moldova delegaţiyasını kabul etmektän büük mutluluk duyêr.

      Ayırı görüşmäk sırasında prezidentlär iki devletin ilerlenmesi için ortak strategiya proektlerinin hem alış-veriş annaşmasının gerçekleşmesinä yakın zamanda karar verdilär.

      “İki devletin arasında şindiki zaman yakın 50 milion dolarlık alış-veriş yapılêr, serbest alış-veriş annaşması imzalandıktan sora bir miliard dolara çıkmasını bekleeriz, – dedi Abdullah Gül. – Statistika bilgilerinä görä, moldovalı turistlerin taa çoyu Türkiyeyä gelmää karar vererlär. Geçän yıl 100 bin moldovalı turist Türkiyeyi seçtii için mutluluk duyêrız”, – nışannadı Türkiye Cumhurbaşkanı.

Moldovanın Prezidenti Nikolae Timofti gözäl karşılanmak için şükür etti hem bitki yıllarda Türkiyenin  büük adımnarlan ilerlediini nışannadı. “Son iki yılın içindä iki devletin aralarında ii baalantıları gözlederiz hem onnarın taa üüsek uura gelmesini isteeriz. Bu işlär taa hızlı olaceklar strategiya proektlerimizi annaştıımız gibi imzaladıktan sora“, – urguladı sayın Timofti.

    Mediyacılarlan buluşmaktan sora Moldovanın Kultura Ministerlii başı Monika Babuk hem Türkiyä Kultura hem Turizma bakannıı başı Ömer Çelik kultura hem incäzanaat uurunda iş birlii planını imzaladılar. Moldovanın Prezidenti Nikolae Timofti Türkiyä Parlamentinin başınnan Cemil Çiçek, Baş Bakan Recep Tayyip Erdogannan da buluşmaları yaptı.

    Günün sonunda  Çankaya rezidenţasında Türkiye Cumhurbaşkanı hem eşi  avşam imeesinä Moldovanın Prezidentini eşinnän kabul etti. Avşam programasına büük elçilär, bilim adamnarı, iş adamnarı, Moldova vatandaşları da katıldılar. Moldova delegaţiyasınnan Türkiyeyä geldilär Moldova Parlamentindä gagauz deputatları Pötr Vlah hem Aleksandr Stoyanoglo. “Meydan” gazetasının adından avşam buluşmalarına katıldı Rafet Köksal.

Sağ üst butonu tıklayarak geri dönebilirsiniz...