1616 defa okunmuş - 03 Şubat 2014 - Pazartesi 13:18

  200 yılda, ani geçti  Kazayaan kurulmasından sora,  seftä yazıldı küüyün istoriyası için kiyat. Kiyatta var bilgilär göçmennär için, patretlär, dokumentlerin originnalları, kendi gözlerinnän görülän oluşlar hem yaşanan türlü zor hem kolay vakıtlar için kazayaklıların annatmaları.

  Kiyatta açıklanêr kazayaklıların çiftçi, asker, ayla strukturaları hem soţial-ekonomika yaşamaları istoriyanın  herbir dönemindä: Rus İmperiyası, Romın Krallıı, Sovet Birlii, Moldova Respublikası. Kiyadın büük payını kaplêêr gerçek dokumentlär hem yaşayannarın patretleri, onnarı açıklayan kısa annatmalar.

  Bu kiyat – ilk denemäk getirmää bir araya Kazayaan geçmişini hem şindiki zamanı. Avtorlar – Stepan Bulgar hem Födor Kılçik – uzun aylar boyunca işledilär arhivlerdä – küüyün primarıyasında, Çadırda “Znamä” gazetasının arhivindä, Kişinövda. Çok gün gezdilär küü içindä, soruşturdular büük insannara, annatsınnar geçirdiklerini, göstersinnär aylä patret albomnarını.  Kiyadın sayfalarına erleştirildi küüyün ilk patretçisinin Aleksandr Fazlının patretleri, veterannarın hem sıradan insannarın annatmaları, aklılarına getirmeleri h. b.

  İdeya yazmaa hem çıkarmaa küüyümüzün istoriyasını annadan kiyadı duudu, açan yapılardı hazırlıklar hem kurulardı Kazayaan  200-cü yıldönümünü için kutlama programası.

Födor Kılçik, Kazayak

 

 

İlgili Fotoğraflar
Sağ üst butonu tıklayarak geri dönebilirsiniz...