Duudu harman ayın 17-dä 1990 yılda Ukraynada Reni kasabasında. Küçüklüünü geçirdi Ҫöşmäküüdä, orada da başardı ilk okulu.
1809 defa okunmuş - 04 Şubat 2014 - Salı 11:11

   Konstantin Kurdoglo

   2007-dä geldi üürenmä hem işlemää Komratta. Üüsek bilgileri kabletti Komrat Devlet Universitetindä, filologiya bölümündä. Șindiki zamanda çalışêr GRT kanalında. Pay aldı Gagauziyanın Genç Yazıcılar Birliin kurulmasında. Yaratmaları tiparlandılar türlü toplumnarda hem gazetalarda.

  «Bän başladım yazmaa 4-cü klasta kendi günnüümdä ilk peetleri, onnar baştan hiç benzämäzdilär peetlerä, ama taa ozamandan duuardılar gözäl fikirlär, peydalanardı kendi annamam dünnää için. Vakıtça  üürendim sevmää büük klasikleri, havezlän okuyardım Ҫ. Dikensı, C. Londonu, J. Vernı. Kiyatlar yardım ettilär bana genişletmää bilgi çerçevemi hem kaavileştirmää ruhumu. Bän şükür ederim benim sevgili üüredicilerimä V.F. Kasap hem E.N. Kösä, angılar inandılar benim kuvetlerimä».

  Bu iki üüredici doorudardılar Elenayı, gösterärdilär ona literaturanın hem dilinin uygunnuunu. Bobası verärdi nasaat, nicä duygulu lääzım annatmaa peetleri. En käämil örnekleri yazmakta Elena alardı okuyarkan A.Puşkini, B. Pasternakı, hem W. Șekspirin çevirili yaratmalarından.

  «Benim peetlerimin temaları – Vatan, ana, küçüklük, sevda. Ҫalışêrım yazmaa annaşılan dildä, kolay kabledilsin insanın kulaannan hem canınnan. Duyêrım kendimi kısmetli, ani var peetlerim, angılar türkü oldular».

   Elena neetlener ileri dooru da çalışmaa yaradıcılık uurunda hem hazırlêêr kendi ilk peet toplumunu.

     Çöşmäküülü

Büük duygumsanabaalı,

Geniş güüdeli topraam!

Çöşmä suylan anılı

Temelin hem çeketmän.

 

Halklar geçti önündä

Serbest, girgin hem güçlü…               

Bela – kısmet gördün sän;

Bän dä tä çöşmäküülü!

 

Yolunu zor annamaa,

Üürenerim kabletmää...

Dan erindän çin-sabaa

Bucaa geler şennenmää!

 

          SABAA

Sabaa serin, çiili otlar,

Eni, taazä, şen duygular.

Yaamurdan sora usluluk,

Serin, taazä, tatlı soluk.

Tä bän – insan, diri, sıcak,

Oldumsana, topraam, dayak.

Eşil kirez fidannarı

Silkerlär şen dallarını.

Yaprakların uçlarından

Damnêêrlar gümüştän çiilär.

Güllär sarı, güllär pembä...

Uşakım, kısmetliyim bän.

Küçük canım çemrek düüler,

Sabaa şennii uyandırêr!

 

 

 

Sağ üst butonu tıklayarak geri dönebilirsiniz...