SÖZ SEDEFLERİ
1661 defa okunmuş - 10 Mart 2014 - Pazartesi 10:22

28. AAR OL DA MOLLA (POPAZ) DESİNNÄR.

Bu söleyişi bulêrız G. Gaydarcının folklor kolekțiyasında. Kullanarmışlar onu Bulgariya gagauzları da (bunun için yazêrlar A. Manov, V. Zayonçkoskiy). Açan adam hopa-zupa fırlêêr, güler, uşak gibi şımarêr, onu insan pek saymêêr. Açan sa o alatlamayarak, enikunu davranêr hem düşünüptä lafeder, insan düşüner: “Bu adam akıllıdır, olmalı o – zaabit (molla, bey, aga)”.

Türk.: Ağır ol da molla desinler.

29. ACI GERÇEK TAA İİ TATLI YALANDAN.

Biz beenmeeriz, açan yakın adamnarımız ya dostlarımız bizä yalan söleerlär. Hepsimiz isteeriz dooruyu bilmää. Belliki, gerçek işleri annadarkan, lääzım ölä lafları bulmaa, ani küstürmemää karşıdakı insanı. Bu söleyişin maanasına hepsi insannar katılmêêrlar, zerä kimi kerä susmaa yada yalan sölemää taa faydalıdır. Sayılêr, ani hasta insana doktorlar diil lääzım herzaman sölesinnär onun gerçek diagnozunu, çünkü var ölä diagnozlar, angıları var nasıl öldürsünär insanı moralca.

Türk.: En acı gerçek en tatlı yalandan iyidir.

30. AL GÖLMEK SAKLANMAZ.

Var ölä kötü işlär, angılarını zor saklamaa, çünkü onnarı hepsi hesapalêr. Bölä olêr ozaman, açan hırsızlık yada yaramazlık yapêr bir büük adam – prezident mi, prokuror mu, deputat mı. Sıradan bir insan yapsa da, okadar şamata kalkmayacek, onun yaptıkları bekim hiç üzä dä çıkmayacek.

Türk.: Al (veyä kanlı) gömlek gizlenmez.

Sağ üst butonu tıklayarak geri dönebilirsiniz...