ANNA DMİTRİOGLO ANMASI İÇİN KUBOK
1323 defa okunmuş - 13 Mart 2014 - Perşembe 09:42

  Baurçu liţeyin raametli üürenicisinä, kız voleybol takımının başına Anna Dmitriogluya, angısı kaybetti canını avtokatastrofada, adlanêr her yıl yapılan voleybol turniri. Yarışmaya gelennär susmak minudunnan andılar Annayı. Takım azaları mezarına çiçek koydular, üüredicilär andılar onu nicä ii ürekli insanı, islää sportçuykayı.

 Edi yıl sıravardı Baurçu küüyündä geçiriler voleybol turniri kız takımnarın aralarında. Adetçä bu turnir yapılêr küçük ayın başında, liţeyin sport salonunda.

 Ev saabileri, ii hazırlıkları yapıp, musaafirlerä raat voleybol oyunu yapmak için hepsini nicä düşer organizat etti. Turnir ii uurda yapılsın deyni, çok zaman, kuvet hem havez, nicä dä her yıl, koydu turnirin iniţiatoru K. Kurdoglo.

 Turnir ilerlemesindä oyun, kızışarak, trenerleri hem taraftarları sıkılı tutardı, çünkü raatlanmaa vakıt yoktu, lääzımdı biri-birindän kaavi takımnarı kazanmaa. Turniri taa da donattı eski dost takımnarın buluşmaları: Baurçu – Çadır, Baurçu – Kıpçak, Kıpçak – Çadır. Bu oyunnarda gösterildi üüsek beceriklik hem tehnika. Bu takımnarın kızları hazır respublika uurunda da yarışmaa. Bölä örnek geçän yıl gösterdi Moşkovun adına liţeyindän kızlar – onnar oldular birinci Moldovadakı liţeylerin arasında. Onnar şindi dä kazandılar hem kablettilär geçici kuboo. Baurçu erleşti ikinci erä, üçüncü – kıpçaklı kızlar oldular hem siiredicilerin baaşışını da kazandılar. Dördüncü oldu Beşgöz takımı. Hepsi takımnara hem en ii oyunculara verildi baaşışlar hem gramotalar, angılarını hazırladı liţeyin administraţiyası. Trenerlär hem siiredicilär seçtilär turnirin en ii oyuncularını: Alina Kösä, Elena Buzacı, Elena Gaydarcı, Kristina Konstantinova, Ekaterina Kristeva, Anna Kopuşçu h. b.

Baş sudya Кonstantin Кurdoglo

İlgili Fotoğraflar
Sağ üst butonu tıklayarak geri dönebilirsiniz...