BİLİM, KULTURA HEM İNCÄZANAAT ÖDÜLLERİ SAABİLERİNİ BULDU
1600 defa okunmuş - 04 Nisan 2014 - Cuma 11:13

  Eskişehir 2013 Türk dünnesinin kultura uurunda baş kasabasının programasına görä, ESOGÜ Kongres Merkezindä “Türk Dünnesi Bilim, Kultura hem İncäzanaat ödül yortusu” geçirildi.

  Türk dünnesinin kultura uurunda baş kasabası olan Eskişehir yıl boyunca halklararası oluşları, proektleri hazırlayıp-geçirer. Türk dünnesinin birliini kaavileştirmäk için neetlerini mutlak tamannamaa düşüner.

  30-dan zeedä izmet ödülü verildi bu toplantıda, hem burada durgunmak yok, neçin deyni kendi misiyasını organizatorlar bölä görerlär: “Türk dünnesini dildä, fikirdä, iştä, ürektä bir hem kaavi dostluk içindä uzun yıllara bilä ilerletmää isteeriz”.

  Açılışta sölendi, ani ödül vermä yortusunun mardın 20-dä geçirilmesi maasuz plannanmıştı: ”Türk kalendarına görä eni yılın ilk günü mardın 21-indä. Türk dünnesindä başka-başka adlarlan kutlanan “Nevruz”, ilkyazın gelmesini hem eni yılın çeketmesini haberleer.Hep türk kalendarına görä, yılın son günündä bu izmet ödülleri türlü disţiplinalarda veriler insannara, ki umutlan dolu bir eni hem gözäl yılı mutluluklan selemnemää”.

  Selemnemäk sözlerindän sora uzak dost hem senselä devletlerdän teklif edilän musaafirlerä ödüllär verildi. Gagauziyadan halk kulturasına izmet için ödül verildi Beşalma küüyün Muzey başına Lüdmila Marin-Karaçobana.

  Hep burada “Saray kıyafetleri” (Padişahlık rubaları) defilesi gösterildi. Programanın bitkisindä Gagauziyadan gelän halk türkü hem oyun kolektivi “Düz-ava” hem anılmış türkücü, kompozitor Pötr Petkoviç konţert gösterdilär.

Sağ üst butonu tıklayarak geri dönebilirsiniz...