Analar-bobalar herzaman kendi uşaklarına ii yaşamak isteerlär, bu sebeptän dä taa ilk günnerdän üürederlär onnarı korkmamaa kösteklerdän, denemää eni üüsekliklerä etişmää, cümnenin kurallarını hatırlamaa. Var uşaklar, angılar duuêrlar zengin miraslan, sade onu üzä çıkarmaa lääzım, bu daavayı çözmää – ana-bobanın borcu.
1637 defa okunmuş - 07 Nisan 2014 - Pazartesi 08:43

   Anastasiya Levçenko edi yaşında. Bu kızçaaz yaşêêr Kagul kasabasında. Onun anası Alöna hem bobası Vadim yardım ederlär açıklamaa ona kendi kenarsız sevgisini muzıkaya. Yol sţenanın basamaklarında diildi kolay, ama, çıktıynan sţenaya, Anastasiya yaklaştı kendi düş gütmesinä – olmaa türkücü.

  Uşaan vergisini hesaba aldıynan, anasıbobası onu beş yaşından vokal, muzıka hem oyun ustalarının ellerinä verdilär, ama zorlatmayıp, sıkmayıp talant kanatlarını.

  Bekim, kimär kerä nazlı, ama pek çalışkan Nastä her ay pay alêr yortulu buluşmalarda, muzıka yarışmalarında hem sevindirer aylesini ilk erlärlän, harizmaylan, gözäl sesinnän. Yaradıcılık onda diil okadar profesional, nekadar kalptän gelmä, bu yaşta başka türlü yok nicä olsun da.

  Anastasiya kendi yaşamasının ilk yıllarını geçirdi İtaliyada, onuştan da ona kolay çalmaa italyanca. Aylä çevresindä o üürendi lafetmää hem çalmaa rusça hem moldovanca, şindi havezlän sesleer ingiliz dilindä türküleri. Nastä geçti «Ring Star» yarışmasının iki turunu, kazandı altını Gruziyada uşaklara deyni türkü festivalindä, gitti Bulgariyaya, neredä gösterdi, ani Moldovada da peydalanêrlar yalabık yıldızçıklar. Bundan kaarä, kızçaaz pek ii üürener şkolada hem, açan var serbest saadı,oynêêr kızkardaşınnan Milenaylan. Șindiki zamanda Nastä anasɪnnan barabar hazırlêêr kendi özel türkülerini, aniki gitmää festivalä Veneţiyaya.

  Kalêr şaşmaa, nicä bukadar iş etiştirer başa çıkarmaa edi yaşɪnda uşak, ama bunun da sebebi var – ana-bobanın inanı, büük sevgisi hem istedii Anastasiyanın gelecää gözäl olsun.

Elena Mokanu

İlgili Fotoğraflar
Sağ üst butonu tıklayarak geri dönebilirsiniz...