BAŞARILI GAGAUZ ÜÜRENİCİSİ – ÖRNEK BAŞKA GENÇLERÄ
1603 defa okunmuş - 08 Nisan 2014 - Salı 11:08

  Alöna Orlioglo duudu Kıpçak küüyündä, Gagauziyada. Orada uşaklıını hem orta okul zamanını geçirdi. Baranovskiy adına liţeydä 12 klas bitirdiynän, ileri dooru o istärdi dizayner zanaatını üürenmää. Yaşamak yolu götürämedi onu büük kasabaya üürenmää, başka üürenicilär gibi. Beklänmedik problemalar ayırdı onu anasından hem bobasından. Kalıp yol ortasında, Alöna, nicä çoyu kararsız gençlär, Rusiyaya ekmek parasını kazanmaa gitti. Orada işlärdi, ama onun aklından hiç çıkmardı mamusun lafları:“Kızım, ekmään olsun deyni, lääzım üürenmää da diplom kabletmää”.

  İki yıldan sora kısmet oldu tanışmaa Köksal aylesinnän. Göz-gözä tanışmadaan, baalantılar, yazışmalar sade telefon hem İnternet aşırı yapılardı. Birkaç aydan sora bu aylenin yardımınnan Alönanın oldu kolayı gitmää üürenmää Ankaraya, özel “Başkent” Universitetinä, menecment uurunda. Burada ilkin o üürendi türk hem ingiliz dillerini, tanıştı başka gagauz hem moldovan studentlerinnän, kurdu eni dostlukları, tanıdı Türkiyayı, orada yaşayan insannarı, bu devletin kulturasını.

  Alöna artık beş yıl Ankarada yaşêêr, şindi bitki kursta üürener. Kendisini pek kısmetli sayêr, neçin deyni onun da yakında olacek bir zaanatı. Elbetki üürenmäk yolunda zor günnär dä oldu, ama onnarı gagauz kızımız çalışkannıınnan, saburunnan, büük istemesinnän ensedi. Univeristettä, bitki yılını geçirärkän, başarılar taa pek belli olmaa başladı. Universitetin adından üstün başarıları için kutlama diplomunu kabletti, çoyu studentlerä gagauz üürenicisi örnek oldu.

   Ko gençlerimizin yolu açık olsun. Ko çalışkan üürenicilerin neetleri gerçekleşsin. Ko evlatboylarımız Vatanını unutmasın, ona izmet ederäk, kendilerinä mutlu yaşamak kursunnar.

 

 

 

İlgili Fotoğraflar
Sağ üst butonu tıklayarak geri dönebilirsiniz...