«AYDINNIK» cümnä topluluunun Paskellä kutlaması
1700 defa okunmuş - 20 Nisan 2014 - Pazar 13:35

Sevgili dostlar!

  Taa bir kerä yaşamamızda biz etiştik o vakıda, açan Hristos Saklı Avşam Sofrasında bitki kerä toplanêr üürenicilerinnän, açan İuda satêr Onu 30 gümüşä, açan arhiereylär hem halkın öndericileri tutêrlar Hristosu, öldürmää deyni. Çoyu beenmäzdi, ne O yapêr hem ne üüreder, ama O bitkiyä kadar, stavroza kadar, hep ölä üüretti hem Kendisini götürdü. O geldi erä, ki biz çıkalım gökä, Allah insan oldu, ki insan olsun allah.

  Geler sıra, biz atılêrız, nicä Hristosun en girgin üürenicisi Petri hem satêrız Onu, nicä İuda. Ama Petri pişman oldu, geeri döndü, İuda sa asıldı. Yaşamamızda hertürlü olêr, Dooruluktan da atılêrız, Sevgiyi da satêrız. Ama sora kimä biz benzeyecez, apostol Petriyä mi osa satıcı İudaya mı — te näända dönüş noktası. Benzärsäk apostol Petriyä, biz deyecez Allaha: «Ey, Saabi, Sän bilersin, ani Seni severim!»  Ne mutlu canına, kim bölä laflarlan karşılayacek Hristosun Dirilmesini — Ayoz Paskelleyi. Parasızlık, kavgalar, politika, türlü problemalar — hepsi kalêr geerdä, açan ileri çıkêr sevgi. Salt sevgiylän herbir zorluk var nasıl çözülsün. Bu Ayoz gündä, yortuların yortusunda, aramızda sevgi iisilmesin, herbir evdä kurulsun bereketli sofra, annaşmakta hem uygunnukta toplansın hepsi evdekilär da, sarmaşarak biri-birinä, sevinmäklän desinnär: HRİSTOS DİRİLDİ! HAKINA DİRİLDİ!

“Aydınnık” CT başı Viktor Kopuşçu

Sağ üst butonu tıklayarak geri dönebilirsiniz...