Kişinövda, Moldekspo salonnarında, her yıl geçer 20-22 sergi.
2014 defa okunmuş - 21 Mayıs 2014 - Çarşamba 11:38
   April ayında dört hafta açık bulunêr “Turizma. Dinnenmäk. Otel.” sergisi.  Kendi mallarını, tekliflerini çıkarêrlar tanıtmaa hem göstermää gelennerä Moldova, Ukrayna, Bulgariya, Romıniya, Türkiya h. b. devletlerdän turistik agentstvoları.
   Oldu 14 yıl sıravardı bizim muzeyimiz katılêr Moldekspo çalışmasına turizma konusunda. Biz temsil ederiz Gagauziyayı  bir turistik marşrutu olarak.
   Bizim regionumuzda bulunêr çok istoriya, etnografiya, kultura obyektleri, angıları bekleerlär turistleri. Bir büük problema sade onda, ani Moldovanın üülen  tarafı taa üürenilmedi, marşrutlar islää bilinmeer.  Bizim studentlerimiz üürenerlär, kablederlär turizma zanaatlarını: menecer, operator; yazêrlar diplom işlerini, aaraştırıp, kurêrlar eni marşrutları Gagauziyada. Ama hep okadar turist sayısı bizim taraflara pek az geler. Respublikanın üülen tarafına marşrutlar pek yavaş gelişerlär. Taa çok bilgilendirmää yabancı turistleri, tanıtmaa bizim tarafları deyni, biz onnara göstereriz hem teklif ederiz Gagauziyada gezilecek erleri, elbet, diil sade Beşalma muzeyini.
    Bu yıl april ayın 10-13 günnerindä Moldekspoya götürdük muzeydän aldıımız eksponatları bölä konularlan: goda peşkirleri örnekleri, makrame hem dekorativ örmä örnekleri, muzey enilii – kilimnär, kiyat satılık-sergisi, P.N. Vlahın köşesi “Sofra hem susaklar”, foto sergisi Moldekspo çalışmasının istoriyasından (bu sergi meraklandırdı hem gelän insannarı, hem dä orada sergi açannarı). Nikolay Kırım, muzeyimizin operatoru, hazırladı videogörüntülerini düün adetlerinnän hem gagauzların ilkyaz yortularınnan baalı adetlerinnän. Bu süjetlär gösterildi kendimiz yaptıımız  ekranda, angısı pek yakışardı sergimizin ekspoziţiyasına.
     Sergimiz kapandı, bekleyecez çıkışları.
Lüdmila Marin
İlgili Fotoğraflar
Sağ üst butonu tıklayarak geri dönebilirsiniz...